ചന്ദ്രനിലേക്കൊരു യാത്ര പോകണം...

നക്ഷത്രക്കുഞ്ഞുങ്ങൾക്കും ചിറകുകൾ മുളയ്ക്കണം,

മുളംതണ്ടുകൾ തോക്കിൻ കുഴലുകളാകണം,
മിന്നാമിന്നികൾ ഉൽക്കകളാകണം,
മയിൽപ്പീലിത്തുണ്ടുകൾ തീ തുപ്പും തൂലികയാകണം.

കടലാസുവഞ്ചികളെ പടക്കപ്പലാക്കണം,
കൊതുന്പുവള്ളത്തെ
അന്തർവാഹിനിയും
കടലാസുപറവയെ
പോർവിമാനവുമാക്കണം.

വാകമരങ്ങളിൽ കരിമരുന്ന് പൂക്കണം.
തേരട്ടയെ തീവണ്ടിയും,
ചെരട്ടയെ ഭൂതത്തിൻ്റെ മുലയും,
കാഞ്ഞിരവള്ളിയെ കിനാവള്ളിയുമാക്കണം.

മഷിത്തണ്ടുകൊണ്ടു
പോയകാലത്തേക്കൊരു
പാലം പണിയണം.

പ്ലാവിലകൊണ്ടൊരു കിരീടമുണ്ടാക്കണം.

എന്നിട്ടും കാലം ശേഷിക്കുമെങ്കിൽ...
അപ്പൂപ്പൻ താടിയിൽ തൂങ്ങി
ചന്ദ്രനിലേക്കൊരു യാത്ര പോകണം.