സ്‌കൂളില്‍ ഉച്ചഭക്ഷണമുണ്ട്

പച്ചയും ചുവന്നതുമായി
പ്ലേറ്റുകള്‍ പ്രത്യേകം
സംവരണം ചെയ്തുവച്ചിട്ടുണ്ട്.

'' പ്ലേറ്റുകള്‍ മാറി
എടുക്കരുത് കഴിക്കരുത്'' - മനുമൊഴിയാണ്.

ഉയര്‍ന്നതും താഴ്ന്നതുമായി
ആരോ ജാതികളെ തരംതിരിച്ചുവച്ചിട്ടുണ്ട്- ചാതുര്‍ വര്‍ണ്യമാണ്.

മനുഷ്യര്‍ക്ക് മാത്രമല്ല;
ഭക്ഷണത്തിനും പ്ലേറ്റിനും ജാതിയുള്ള
ഒര്ജ്ജാതി കാലമാണ്.

വിഭവമല്ല;
പ്ലേറ്റിന്റെ നിറം മാറിയെടുത്തതാണ്.
ശിക്ഷയുണ്ട്;
ഒരിക്കലും അതൊരു കുറ്റമല്ലേലും.

കാട്ടുദൈവങ്ങളാണ് ചുറ്റും
കാട്ടുനീതിയേ കാണൂ.

ഛര്‍ദ്ദിച്ച് തീരുവോളം മര്‍ദ്ദിച്ച മാഷേ,
ചോരയൊന്നെടുത്ത് ടെസ്റ്റുചെയ്യണം.
നിറമൊന്നേ കാണൂ...
കുലമൊന്നേയുള്ളൂ...