ദൈവത്തിന്റെ നാട്

ദുരമൂത്ത് കാടിളക്കി
മലതുരന്ന് നാടിളക്കി
വയലുനികത്തി മണ്ണിട്ടുമൂടി
കായലുനികത്തി നിരപ്പാക്കി
മരംമുറിച്ച് കുഴികുഴിച്ചു,
വെള്ളം നിറച്ച് കുപ്പിയിലാക്കി.
ഭൂമിയളന്ന് വീതിച്ച് വിലപേശി.
പാറപൊട്ടിച്ച് മണിമാളിക പണിതു.

എന്നിട്ടും ...
ഉത്തരാഖണ്ഡ് കണ്ട്
വാവിട്ട് കരയുന്ന സോദരാ
കണ്ണിലുപ്പുനീര് ബാക്കിവച്ചോ
നിനക്കിനിയും കരയാനുള്ളതാ...
ദൈവങ്ങളൊന്നും കൂട്ടിനുണ്ടാകില്ല!